शान्ति सुरक्षा र अपराध न्यूनीकरणमा ललितपुरका युवा

फागुन १६, ललितपुर

राष्ट्रिय युवा महासंघ नेपाल, ललितपुरले शनिबार पाटन संग्रहालमा समाजमा शान्ति सुरक्षा र अपराध न्यूनीकरणमा युवावर्ग तथा समुदायको भूमिका बिषयक अन्तरकृया कार्यक्रमको आयोजना गरेका छन ।

सो अवसरमा ललितपुरका प्रमुख जिल्ला अधिकारी ढुण्डीप्रसाद निरौलाले युवावर्ग परिर्वतनको संवाहक रहेको उल्लेख गर्दै उनीहरुमा सकारात्मक सोच, सामाजिक मूल्य र मान्यताप्रति संवेदनशीलता र रचनात्मक क्रियाकलापमा सहभागी गराउन सके अपराधको दरमा कमी आउने विश्वास व्यक्त गर्नुभयो।विदेशी संस्कृति र संस्कार कति हदसम्म अनुकरण गर्ने, आफ्नो सामाजिक र सांस्कृतिक परम्पराप्रतिको ज्ञान, सामाजिक स्वीकार्यता बुझ्ने र विवकेशील युवावर्गले समाज रुपान्तरणमा महत्वपूर्ण भूमिका निर्वाह गर्ने पनि प्रमुख जिल्ला अधिकारी निरौलाको धारणा रहेको थियो ।

सो कार्यक्रममा महानगरीय प्रहरी परिसर ललितपुरका प्रमुख एवं प्रहरी वरिष्ठ उपरीक्षक किरण बज्राचार्यले युवावर्ग अपराधिक कार्यमा संलग्न हुनुमा सामाजिक, आर्थिक, मनोवैज्ञानिक तत्वको प्रभावबारे विभिन्न उदाहरणहरु प्रस्तुत गर्दै सही संस्कार, सामाजिकरणले जनमैत्री प्रहरी प्रशासन थप प्रभावकारी हुनुकासाथै अपराध न्यूनीकरणमा सहयोग पुग्ने विचार व्यक्त गर्नुभयो । अपराधमा युवावर्गको संलग्नता समाज र परिवेशको उपज रहेको बताउँदै उहाँले सामाजिक वातावरण राम्रो बनाउन प्रहरी प्रशासन संगसंगै युवावर्ग र समुदायले साझेदारी गर्दै प्रभावकारी भूमिका निर्वाह गर्नुपर्नेमा जोड दिनुभयो ।

अरनिको सांस्कृतिक तथा व्यावसायिक समाजका अध्यक्ष अजरमान जोशीले प्रहरी प्रशासनलाई हेर्ने सामाजिक दृष्टिमा परिर्वतन ल्याउन ललितपुरमा प्रहरी समुदाय समन्वयको बिगत संगै बिशेषत लागूऔषध दुर्व्यसन बिरुद्धको युवावर्गको अभियानले ठोस भूमिका निर्वाह गरेको बताउनुभयो ।

सो अवसरमा युवा महासंघ नेपालका सल्लाहकार एवं नेवाः पत्रकार राष्ट्रिय दबूका महासचिव सुनील महर्जनले समाजमा युवावर्गको ज्ञान, सोच र प्रश्न गर्ने स्वभावलाई स्वीकार गर्र्दै उनीहरुमा भएका क्षमता र प्रतिभालाई सामाजिक रुपान्तरणमा लगाउन समाजका विभिन्न तहतप्का संगै समुदायमैत्री प्रहरी प्रशासनको सकारात्मक भूमिका रहने बताउनुभयो ।

सभामा महासंघका अध्यक्ष राजन महर्जनले अहिलेको प्रशासन युवामैत्री नभएका कारण अनेक दुःख पाउने गरेको बताउँदै सार्वजनिक प्रशासन युवावगप्रति संवेदनाशील हुनुपर्नेमा जोड दिनुभयो । प्रहरी प्रशासनको गलत व्यवहारले युवावर्गमा अनेक निराशा छाएको बताउँदै प्रहरी प्रशासनलाई जिम्मेवार बनाउन नागरिक खबरदारी, रचनात्मक गतिविधि आवश्यक रहेको पनि अध्यक्ष महर्जनको धारणा रहेको छ ।

कार्यक्रममा समाजसेवी हसिना शाक्यले समाजमा युवा कुलत तथा दुर्व्यसन बिरुद्धको सचेतना परिवार र गृहिणीहरुमा अभिबृद्धिकालागि बिगतमा आयोजक संस्थासंग प्रभावकारी सहकार्य गरेको सम्झिंदै कोभिड महामारीका कारण न्यून बनेका गतिबिधीको निरन्तरता आवश्यक रहेकोमा जोड दिनुभयो । त्यस्तै बौद्ध युवा कमिटीका बौद्ध अध्ययेता अनिल शाक्यले सारा अपराधको जड नै व्यक्तिभित्र लुकिरहेको अतिशय लोभ, द्वेष र मोह रहेको धारणा राख्दै त्यस हटाउन राम्रो परिवेश, शिक्षा संस्कारसहित आध्यात्मिक शिक्षाको आवश्यक रहेको विषयमा आफ्नो धारणा राख्नुभयो । त्यस्तै महासंघका उपाध्यक्ष प्रणीता शाक्य, , महासंघका सचिव सुरज खड्का लगायतले युवावर्ग र अपराध न्यूनीकरणका विविध पक्षमा आफ्नो धारणा राख्नुभएको थियो । सो अवसरमा प्रहरी उपरीक्षक प्रज्वल महर्जन, प्रहरी नायब उपरीक्षक रमेश बोहोरा ,महासंघका निर्वतमान अध्यक्ष राजेश बज्राचार्य र विभिन्न प्रभागका प्रमुखहरुको उपस्थिति रहेको थियो ।

Spread the love

Related posts

Leave a Comment